اولا اللوبيا كي نشريها نغسلها مليح ونحطها في ماء نتاع الشرب احنا نقولو ماء مسوس لانو كاين مناطق الماء نتاعهم فيه نسبة من الملح كيما بسكرة وهداك الماء يخلي اللوبيا ولا الحمص يجيو يابسين ومايطيبوش
المهم حطي ضعف كمية الللوبياء ماء زيديلها نصف باكي خميرة الحلوى وحطيهم على النار حتى يولي الماء دافي فقط مالازمش يسخن خليها تترنخ فيه 12 ساعة يعني مثلا اعمليها في الليل قبل ماترقدي وفي الصباح صفيها في كسكاس وماتعاوديش تشليها بالماء خليها هكداك وحطي الكمية اللي تحتاجيها في الكوكوط والباقي حطيه في كيس وخبيه في الكونجي لاتور لوقت الحاجة
نبدا تحضيرها
حطي الكمية اللي تحتاجيها من اللوبية في الكوكوط وحطي فوقها ضعفها ماء نتاع الشرب يكون بارد ماشي ساخن لان الماء الساخن يخليها تذوب من برا وتبقى يابسة من الداخل وزيدي نصف ملعقة كسبر جاف مطحون ورشة كمون اغلقي الكوكوط وكي تغلي وتبدا تصفر نقصي النار وخليها على نار متوسطة من ساعتين الى ثلاث ساعات لازم تبقى فيها كمية متوسطىة من الماء وكي تلقاي الحبات طابو حتى انقسمت الحبة على اثنين ورجع لون الماء ابيض غامق كيما الحليب اعرفي بلي وصلتي للنتيجة المطلوبة
في النصف ساعة الاخيرة حضري المرق او الصوص
في طنجرة ولا كوكوط حطي بصلة كبيرة ولا زوج صغار مرحيين في الروبو ولا الميكسور مع نصف كاس ماء وثلاث سنات ثوم انا زدت رحيت معاهم حبة جزر وزيدي فوقهم نصف ملعقة من كل من كسبر وكروية وفلفل اسود وكمون وبابريكا وملح حسب الرغبة وقيس ملعقة دبشة او حشيش مقطعة رقيق ونصف ورقة رند اختياري وملعقة ونصف طماطم مصبرة
زيدي لحم ولا دجاج حسب الرغبة وادا ماكاش ماتعمليش انا في اغلب الاحيان نعملها من دون لحم
خلي الكل يتقلى مع بعض بلا ماتخلطي على نار متوسطة عشر دقايق ومرقي بكاس ماء وخليه على نار هادئة نصف ساعة وادا بدون لحم خليه عشرين دقيقة
كي تطيب اللوبياء صبي فوقها الصوص وحطي معاها قرن فلفل حار وخلي الكل يغلي مدة خمس دقايق وطفي
كي تجي تقدميها ماتنسايش ترشيها بشوية زيت زيتون وشوية دبشة او حشيش مقطع
وفي الاخير نتمنى تجربوها وانا متاكدة راح تعجبكم